مولانا ابوالکلام آزاد کی پیش گوئیاں

پاکستان ریاست مدینہ کے استثنیٰ کے ساتھ دنیا کی پہلی ریاست ہے جو اسلام کے نام پر معرض وجود میں آئی ۔ دو قومی نظریہ کی بنیاد پر وجود میں آنے والے پاکستان کا مقصد یہی تھا کہ مسلمان اپنے نظریات و عقائد اور اپنی تہذیب و ثقافت کے مطابق آزاد انہ زندگی گزار سکیں ۔ تحریک پاکستان کے دوران ہندوؤں کی سیاسی جماعت کانگریس کے علاوہ مسلمانوں کے بعض حلقے بھی دو قومی نظریہ یعنی قیام پاکستان سے متفق نہ تھے۔ ان میں ایک بلند پایہ شخصیت مولانا ابوالکلام آزاد کی بھی تھی ۔ انہیں دو قومی نظریے پر بننے والی مسلم ریاست کے بارے میں بہت سے تحفظات اور خدشات لاحق تھے۔ مولانا ابوالکلام آزاد اپنے وقت کے جید عالم دین ، مدبّر، مفکر، مفسر ِ قرآن، بے باک مقرر و صحافی اور صاحب طرزِ ادیب تھے۔ ان کا شمار برصغیر کے صف اوّل کے سیاستدانوں میں ہوتا تھا۔ ان کے نظریات سے اختلاف کیا جا سکتا ہے لیکن ان کی سحر انگیز شخصیت سے انکار ممکن نہیں ۔

انہوں نے اپریل 1946ء میں معروف صحافی آغا شورش کاشمیری کو ایک انٹرویو میں پاکستان کے حوالے سے متعدد خدشات کا اظہار کیا تھا جو اس وقت دیوانے کی بڑ سمجھے گئے لیکن افسوس کہ بعد میں ان کی یہ باتیں کافی حد تک درست ثابت ہوئیں۔ انہوں نے خدشہ ظاہر کیا تھا کہ قائد اعظم اور خان لیاقت علی خان جب تک زندہ رہیں گے ، پاکستان ایک رہے گا لیکن ان کی وفات کے بعد اس کے دونوں حصوں یعنی مغربی اور مشرقی پاکستان کا متحد رہنا دشوار ہو جائے گا۔ ان کا کہنا تھا کہ مشرقی پاکستان کی علیحدگی کے بعد پنجاب ، سندھ ، بلوچستان اور سرحد (موجودہ خیبرپختونخوا) کے مابین صوبائی اور نسلی تعصبات کو ہوا دینے کے لئے بیرونی مداخلت کے دورازے کھل جائیں گے ۔ پاکستان کا اقتدار وڈیروں ، جاگیر داروں ، صنعت کاروں اور نودولتیوں کے ہاتھوں میں چلا جائے گا جو قومی دولت کی لوٹ مارمیں لگ جائیں گے۔ قومی سرمایہ بیرون ملک منتقل کیا جانے لگے گا ۔ان لوگوں کی لوٹ مار کے سبب ملک میں ایک طبقاتی جنگ کا ماحول پیدا ہو گا ، بیرونی قرضوں کا بوجھ بڑھ جائے گا۔

نااہل سیاسی قیادت فوجی آمروں کے لئے راہ ہموار کر دے گی پاکستان کے اپنے پڑوسیوں کے ساتھ تعلقات خراب ہوں گے۔ ملک کو کنٹرول کرنے کے لئے عالمی سازشیں بڑھیں گی۔ ایسی صورتحال پیدا کر دی جائے گی کہ ملکی استحکام بیرونی دباؤ کا شکار ہو نے لگے گا ۔ مسلم ممالک کسی بھی قسم کا تعاون کرنے کی پوزیشن میں نہیں ہوں گے ۔ شرائط کے بغیر بیرونی امداد کا حصول ممکن نہیں ہو گا ۔ جس کی وجہ سے پاکستان نظریاتی اور سرحدی سمجھوتوں پر مجبور ہو جائے گا ۔نوجوان مذہب اور نظریہ ء پاکستان سے دور ہونے کے ساتھ ساتھ مستقبل سے مایوس ہونے لگیں گے ۔ مولانا کا خیال تھا کہ پاکستان بننے کے بعد اس پر مغربی قوتوں کا تسلط قائم ہو جائے گا اور ساری سیاست کا محور و مرکز ’’لندن‘‘ ہو گا ۔عالمی سامراجی قوتیں کسی صورت ایک مضبوط مسلم ریاست کو پھلتا پھولتا نہیں دیکھ سکیں گی۔ اپنے مفادات کے لئے وہ پاکستان اور بھارت کو آپس میں لڑائیں گی ۔ فرقہ پرستی اور مذہبی شدت پسندی بہت زیادہ ہو جائے گی ، یہ سوچ پاکستان کی نظریاتی اساس کو سخت نقصان پہنچائے گی ۔

مولانا آزاد ابوالکلام کی یہ سوچ مسلمانانِ برصغیر کی اجتماعی سوچ نہیں تھی لیکن اب جبکہ قیام پاکستان کو بنے 74 برس بیت گئے ہیں ، ملکی سیاسی و معاشی حالات کا جائزہ لیا جائے توان کی یہ باتیں کچھ غلط بھی نہیں لگتیں ایسا لگتا ہے کہ ہماری سیاسی قیادت نے مولانا آزاد کے خدشات و تحفظات کو غلط ثابت کرنے کے لئے کوئی شعوری کوشش کی ہی نہیں۔ بلاشبہ بانی پاکستان قائد اعظم محمد علی جناح نےٹھوس حقائق کے پیش نظر اس خطے کے مسلمانوں کے لئے ایک علیحدہ ریاست حاصل کر کے مسلم اُمہ پر بڑا احسان کیا لیکن ہم دو قومی نظریے پر بننے والے اپنے ملک کو متحد نہ رکھ سکے اور مشرقی پاکستان الگ ہو گیا۔ افسوسناک امر یہ ہے کہ وطن عزیز کا موجودہ نقشہ کافی حد تک مولانا ابوالکلام آزاد کی پیش گوئیوں پر پورا اترتا محسوس ہوتا ہے اور بانیان ِ پاکستان کے نظریات و افکار سے کوسوں دور ہے۔

اب بھی وقت ہے کہ ہمارے حکمران بچے کھچے پاکستان کی بقا و سلامتی کے لئے اپنی تمام تر صلاحیتوں کو بروئے کار لائیں۔ فیصلہ ساز قوتیں اپنے ذاتی مفادات کو بالائے طاق رکھتے ہوئے ایسی قومی پالیسیاں مرتب کریں کہ جن کے تحت ملک میں صوبائیت، لسانیت اور فرقہ وارانہ کشیدگی میں کمی واقع ہو اور ہم یہ ثابت کر سکیں کہ برصغیر کے مسلمانوں کا دو قومی نظریے کی بنیاد پر ایک علیحدہ خود مختار ریاست بنانے کا فیصلہ درست تھا اور مولانا ابوالکلام آزاد سمیت کانگریسی مسلمانوں اور دوسرے مخالفین کے خدشات بلاجواز تھے ۔

ڈاکٹر جمال ناصر

بشکریہ روزنامہ جنگ
 

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.