سینئر و جہاندیدہ سیاستدان سردار عطاء اللہ مینگل

ان سے اختلاف رائے کیا جاسکتا تھا لیکن ان کے انداز سیاست اور سیاسی معاملات پر گفتگو کا ہنر ان کی شخصیت کی انفرادیت تھی۔ وہ شائستگی متانت اور شرافت کی میراث دے کر رخصت ہوئے، عطااللّٰہ مینگل بلوچستان نیشنل پارٹی کے سربراہ اور سابق وزیراعلیٰ بلوچستان اختر مینگل کے والد تھے۔ سردار عطااللہ خان مینگل 1929 میں بلوچستان کے شہر وڈھ میں سردار رسول بخش مینگل کے ہاں پیدا ہوئے تھے۔ وہ یکم مئی 1972 سے 13 فروری 1973 تک بلوچستان کے پہلے وزیر اعلیٰ رہے۔ وزیر اعظم ذوالفقار علی بھٹو نے جب 1973 میں بلوچستان میں گورنر راج لگا کر ان کی حکومت ختم کر دی اور بلوچستان میں آپریشن کیا تو اس کے خلاف سردار عطااللہ مینگل نے مزاحمت کی اور اسی بنیاد پر انھیں کئی سال تک جیل میں رکھا گیا۔

بعد ازاں انھوں نے کئی سال تک لندن میں جلاوطنی اختیار کی اور 1990 کی دہائی میں جلاوطنی ختم کر کے واپس وطن آئے، جس کے بعد بلوچستان اور ملکی سطح پر سیاست میں دوبارہ فعال کردار ادا کیا۔ 6 دسمبر 1996 کو بلوچستان کے تمام قوم پرست جماعتوں پر مشتمل بلوچستان نیشنل پارٹی کی بنیاد رکھی اور 1997 کے انتخابات میں بلوچستان نیشنل پارٹی نے صوبے میں اکثریت حاصل کی۔ سردار عطااللہ مینگل کے بیٹے اختر جان مینگل 22 فروری 1997 کو وزیراعلیٰ بلوچستان منتخب ہوئے، اور 19 ماہ تک بلوچستان کے وزیر اعلیٰ رہے۔ مرکزی حکومت کے ساتھ اختلافات کے بعد جولائی 1998 میں اختر جان مینگل نے استعفیٰ دے دیا۔ سردار عطااللہ مینگل 2006 میں ضعیف العمری کے باعث عملی سیاست میں غیر متحرک ہو گئے، بلوچ سیاست انھیں ہمیشہ یاد رکھے گی۔

بشکریہ ایکسپریس نیوز

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.